ولله الحمد مازالت بعض الاوديه المجاوره لضرماء تمشي حتى الآن من سيول البارحه , سيل الحَوَرْ يصل طريق الغزيز عصر اليوم ويطمره ويجري بسيل متوسط من امطار البارحه والحور معروف ما يسيل إلا بعد هطول الامطار الغزيره جدا وهو باطن كبير وعريض يتخلله مزارع تصب فيه الاوديه مثل الودي وابوصفي والاصيقعات وغدده , الودي اعاليه محاذيه لـ الشمس والشميسه وابوصفي وغدده سيولها يتجي من جبال طويق اللي فاضي بكره الصباح اذا كان الجو صحو ومافيه امطار ويبي يشوف السيل ينزل مع القديه وبعد القديه ب 6 الى 8 كم تقريبا يجيك مفرق ضرماء - شقراء - مرات - البره على اليمين لف مع الطريق وابتل مع الطريق الين تجي ضرماء وخل سيره عدل اطلع من ضرماء مسافة 15 كم تقريبا يجيك لوحات ومفرق على اليسار بجنب وادي الحيسيه ( الغزيز - بدائع ذوي زياد - درة البدائع ) لف يسار وخل سيره عدل وارجو اخذ الحذر تجيك روضة سمحان قبل الجبل على اليمين والطريق بجانب الروضه مغمور بالمياه هدئ السرعه بعد ما تتعدى روضة سمحان خل سيره عدل يجيك ريع سمحان وهو الطريق بين الجبلين بعد الروضه مباشره وامش تقريبا 4 كم تقريبا إلين تلقا السيل يقطع الطريق وممكن تحصل ممشاه خفيف بكره , السيارات الصغيره ممكن تقطع الطريق المغمور بالمياه اللي بجنب الروضه وممكن ماتقطع لأن الماء مغطي الطريق .